Runde 2 i OKK-kampanjen

Sommaren 2008 starta OKK-kampanjen, der innbyggjarane i Os og nabokommunane blei inviterte til å kjøpa andelsbrev til 2000 kroner eller stolsete til 10.000 kroner, som støtte til Os kunst- og kultursenter.

- Gruppa "Kulturvenar av Os" har gjeve 4,5 millionar kroner. Kjøp av andelar og stolsete utgjer like over 2 millionar kroner, fortel ordførar Terje Søviknes. I tillegg har ein anonym osing gitt 10 mill kroner til prosjektet. I alt har lokale krefter no bidratt med heile 16,5 mill kr til OKK, seier ein oppglødd ordførar Terje Søviknes.
Mæland-skulptur i premie.

Arbeidet på tomta starta i april og målet er at OKK skal stå ferdig hausten 2010. Os kommune distribuerer no ein forkorta versjon av brosjyra som starta OKK-kampanjen i fjor. Her finn ein som tidlegare bankgiro som kan nyttast ved kjøp av andelar eller stolsete. Bankgiro kan også lastast ned på denne nettsida, sjå vestre spalte.

- Dei som har kjøpt eller kjøper andelsbrev eller stolsete har, uavhengig av sum, eit lodd i trekninga av ein Arne Mæland-skulptur til ein verdi av rundt 30.000 kroner, fortel Søviknes. Trekninga finn stad 4.juli under avslutninga av Skulptursymposiet 2009.
Bronseskulpturen, som har 24 karat bladgull på kjolen, heiter "Dansar". Mæland var inspirert av Anitra, jenta som dansa rundt Peer Gynt, men som han ikkje kunne få, då han lagde ein moderne versjon av dansaren.

- Med all den scenekunsten som vi skal få oppleva i kunst- og kultursenteret trur eg denne passar fint som premie, seier Arne Mæland.
Dugnad

- Vi vonar verkeleg at osingane no vert med i ei kulturmobilisering for OKK! Vi har god von om at staten vil gje økonomisk støtte til prosjektet, men vi treng framleis hjelp frå bygdefolket. Eit andelsbrev eller stolsete gjer OKK til ”litt ditt”, seier en optimistisk Søviknes. Han poengterar at senteret vert den nye storstova til osingane, der ikkje minst barn og unge skal få eit fantastisk kulturtilbod.

- I fjor fekk vi høyra at mange var litt avventande i høve bidrag til OKK-kampanjen i frykt for at prosjektet ikkje vart realisert. No er vi i gang med bygginga, og senteret vert ein realitet. Kjøp eit andelsbrev eller stolsete før 4.juli, og støtt eit fantastisk prosjekt for Os-bygda, appellerar Søviknes.
Kanskje er det nett du som vinn Mæland-skulpturen!